Ǽрыдоны 5 - ǽм рǽвдауǽндоны ацыд семинар

Ǽрыдоны 5 - ǽм рǽвдауǽндон «Аргъау» - ы ацыд интеграцийы хуызы арǽзт ахуыры сахат. Темǽ: Ног аргъау, «Сабитǽ тыппыроны куыд фервǽзын кодтой». Гом урок бацǽттǽ кодта рǽвдауǽндоны полилингвалон къорды хъомылгǽнǽг – Дудиаты Зитǽ. Гом урокǽн аргъ кǽнынмǽ ǽрбацыдысты уазджытǽ: Цǽгат Ирыстоны Паддзахадон Педагогон Институты «ЮНЕСКО»-йы кафедрǽйы специалист Бестауты Заирǽ, Дзǽуджыхъǽуы 60 - ǽм рǽвдауǽндоны сǽргълǽууǽг Ǽхполǽтты Аидǽ, ахуырады хайады управленийы методист Хестанты Альбинǽ, районы рǽвдауǽндǽтты ирон ǽвзаг ǽмǽ литературǽйы хъомылгǽнджытǽ.

Семинары сǽйраг нысан: сабиты сфǽлдыстадон активон архайдǽн, хистǽр ǽмǽ кǽстǽр къорды сывǽллǽтты иумǽйаг архайдǽн хъǽугǽ уавǽртǽ аразын.

Семинары сǽйраг хǽстǽ: сабиты зонындзинǽдтǽ хъǽддаг сырдтǽ ǽмǽ хǽдзарон фосы тыххǽй уǽрǽхдǽр кǽнын. Рǽзын кǽнын сабиты фǽлгǽнǽн ǽмǽ мысǽнуат. Разǽнгард сǽ кǽнын ног зонындзинǽдтǽм, ирон ныхасы рǽзтыл сǽ кусын. Сабиты цымыдис кǽнын алфамблайы дунемǽ, уарзон ǽмǽ аудгǽ цǽстǽй куыд кǽсой цǽрǽгойтǽм, уый тыххǽй.

Интеграцийы хуызы арǽзт ахуыры сахат тǽ аразынц уый тыххǽй, цǽмǽй сабиты дзырдуат фǽхъǽздыгдǽр, фǽпарахатдǽр уа. Сывǽллǽтты зǽрдǽты хорздзинад саразын куыд уа, уыцы хуызы сǽ хъомыл кǽнынц рǽвдауǽндоны хъомылгǽнджытǽ, стыр ахъаз та цын сты ацы семинартǽ.